Kryeministri i vendit, Albin Kurti ka vizituar familjen e dëshmorit të kombit, Shpëtim Bojku.

Me anë të një postimi në Facebook, ai tha se sakrifica e dëshmorëve dhe martirëve është themeli i shtetit dhe i lirisë që e gëzojmë, shkruan Arbresh.info.

Tutje ai tha se nderimi për veprën e tyre është i përhershëm siç është edhe mirënjohja për familjet e tyre.

“Në Pejë vizituam familjen e dëshmorit të kombit, Shpëtim Bojku. Një luftëtar i dalluar i Ushtrisë Çlirimtare të Kosovës, që me trimëri e përkushtim të pashoq luftoi për çlirimin e atdheut. Në betejën e lavdishme të Koshares, duke luftuar ballë për ballë me forcat serbe, më 28 prill 1999, Shpëtim Bojku ra heroikisht në fushëbetejë.”, shkroi ai.

“Sakrifica e tij dhe e të gjithë të rënëve për liri mbetet frymëzim i përhershëm për të punuar me përkushtim për Republikën tonë!”, u shpreh Kurti.

“Lavdi jetës dhe veprës së tij!”, tha Kurti.

“I përjetshëm qoftë kujtimi për të gjithë dëshmorët e kombit!”, përfundoi ai./Arbresh.info/